ودبشير ارض الشمال
مرحبا بالزاير الكريم انت لم تسجل بعد سارع
بالتسجيل
او الدخول
‏ ‏ نرجو ان تجدوا ما يسركم و نتعاون معا ليرتقي الي ما نصبو اليه

والله ولي التوفيق
ودبشير ارض الشمال

اسلاامي / اجتماعي / ثقافي / رياضي/ برامج والعاب / اكواد دعم منتديات
 
الرئيسيةالرئيسية  البوابةالبوابة  المنشوراتالمنشورات  التسجيلالتسجيل  دخول  صفحتنا على الفيس بكصفحتنا على الفيس بك  

شاطر | 
 

 الشاعرالفاتح ابراهيم بشير

اذهب الى الأسفل 
كاتب الموضوعرسالة
Admin
Admin
avatar

عدد المساهمات : 795
تاريخ التسجيل : 30/03/2012
العمر : 62
الموقع : wadbashir.2morpg.Com

مُساهمةموضوع: الشاعرالفاتح ابراهيم بشير   الأحد يونيو 15, 2014 5:02 pm

يا ماشي للعامراب
الفاتح ابراهيم بشير
:::::::::::::::::::::

يا ماشي للعامراب ... ما تسوقني في دربك
وديني للأحباب ... الله يزيل كُربك
أنا يا رفيق مشتاق ... للحلّي لي ناسي
للشلة والطنبور ... الطوّقوا احساسي
في الغربة أشوفُن وين ... وأنا في الحزن راسي
وطبعاً فراق الدار ... حاسِّيبو في قلبك
صدقني يا مرسال ... كل يوم يزيد شوقي
للحلي والجيران ... وللغالي معشوقي
ولي قعدة جم نخلات ... والقمري بيقوقي
وللمنقة والبرسيم ... والموية بي جنبك
أنا من هجرت النيل ... ما نمت يا صاحي
وشايل الوطن جواي ... في حزني وأفراحي
طاري الرمال والليل ... وقعداتنا صبّاحي
وطنبورنا لما ينوح ... أوتارو ترحل بك
***************************
دا الشمال يالداير تشوفو



شوف شمال اهلي الافاضل ليل نهار في العزة رافل
فيه مضبوع سر الاهي بدري كان تحلمبو بابل
حاضنو هو النيل بي محنه وبس عشانو هو جانا مايل
وانحنى وغير مسارو ولفة ابو حمد الدلايل
كل منابع الطيبه فيه نالبهن اعلى المنازل
وبي شعر محفوظ مخلد في دواوين الاوائل
دا اليطوف هيبة ربوعو يستفيد لو يبقى ماهل
يا يشملو نسمه عابري ماخده ريقه من الخمايل
ويا ملك وجدانو منظر يقتل الهم والبهادل
والرسول قال في حديثو ومافي اصدق منو قايل
الخدار والمويه جمبو بلثم الهم والمشاكل
يا سمعلو قصيده صادقي ترسل الاشواق قوافل
يا نغم طمبور حنين يستقر جوه الدواخل
ويا قمريتا تقوقي فوق تميره صبطه شايل
يا قعد بي ايدينو يشرب مويه صافي من الجداول
ويا يشوفلو كمان مزارع شايل الطوريه نازل
بي نشاط قاصد زراعتو والصعب بيشوفو ساهل
ويا كمان متع عيونو بي حسان زي الارايل
زوق وطيبه ادب خيالي في عفاف ما منو مايل
ويا كمان لاقوهو اهلنا بي كرم من غير مقابل
وروهو انو الدنيا لسع فيها خير وانبل خصايل
يكرموك لو جيته فوقم يجبروك لو ماكا نازل
ده الشمال يالداير تشوفو بالنهار الفيهو حاصل
اما في وقت الاماسي ليلو ضمه جميل وحافل
نتفق من بدري شله ونطلع القيزان قوافل
فيها يجمع شملنا في رباط زي العوائل
ونبدا نسأ ل عن بعضنا يا محمد وينو عادل
وشوفو يا ناس وين سيد احمد اصلو زولا ديمه ماهل
ونمسك الطمبور ننقرش لحن تنهاربو المفاصل
ونحن في عزت قعادنا يبدا واحد داير يجادل
وبي محنخ نقولو ياخي .. يا فلان خليك عاقل
خلنا النسمع معاكا ..اشتهيت بس اسي كامل
ويا فلان قلك قصيده تروي ايا منا القواحل
جايه من وجدان وصادقي ليها تهتز الجنادل
وفي الختام نطرب نغني وما بنعرف قيل وقايل
ده الشمال يالداير تشوفو رغم وصفي انا ماهو كامل
ده الكمال لله وحدو لا بينوم لا بتلقى قافل
************************
أنا لو كتلني الشوق

انا لو كتلني الشوق صدقني ماغلطان
ما انتا خليتني جواب بلا عنوان
تايه مع الايام من باحة لي باحة
شايل هموم الناس وخلق الله مرتاحة
افراحي مقفولة ومالاقي مفتاحه
والشاله زول نسااي من وين تجي الراحة؟
اشواقي يالمحبوب اكبر من الغنوات ولو دار تعرف البي كدي
اسال النجمات
بتقولك المستور وكيفن ملكتا الذات
وكيف انتا في دمي ومستوطن الخلجات
علمني حبك جد كيفن اكون وافي
وكتين يطولبي الليل ويبقى الامان مافي
انا..انت..والاحلام والواقع الجافي بيناتنا اقوى صراع في عشنا الدافي
بس انت ابقى معاي والباقي كلو يهون
اتحمل الالام والخاطر المحزون
باكر طيور الريد تملى الاماسي شجون
في الساعة ديك يازول الدايرو الله بكون
انا لو قتليك بنساك صدقني اكون كضاب
اناكنتا قبلك زول تايه بلا هداي
زي الغمام رحال ماداري وين مرساي
وكتين رايت عينيك وفيهن لقيتو دواي...عادليا عمري الراح حسيت باني شباب
انتا قفلتا باب قلبي ومفتاحو شلتو معاك
خليتني اشوف الكون باهت جمالو بلاك
مشكلتي يالمريود داير اطولو سماك
لكنو ريشي دقاق والجو غيوم وضباب
ريدك بلا ميعاد هبش النسيج الحي
حملني فوق طاقتي اعياني مني ولي
ماقالو في الامثال اخر العلاج الكي والموت دوام واحد وتتعدد الاسباب
القاك معاي ومعاي ..زي لو معاي ياريت ..
زي الحنين والشوق في الغنوة والدوبيت
زي الضفاف والنيل والودعة والسوميت
ما انتا ليا بقيت زي السؤال وجواب
لوقتليك بنساك..في زول بنسى روحو دحين؟
لوحتى كان مشغول لابد يشدو حنين
اصلو العشق غلاب
اصلو الغرام غلاب
مهما ندسو يبين
نقراهو في العينين ظاهر كانو كتاب
لو قتليك بنساك صدقني اكون كضاب
انت البنيت جواي للريدة سور وابواب
***************************
رايك شنو نفتح مساحات للحوار
ويا امة عاد نتفق ياكلو حي يسكنلو دار
معقولة بي طول الزمن راس مالنا يبقى الاعتذار؟
لاقادر القاك واستريح لا يدرك الليل شهريار؟
بهواك انا..بهواك انا وعارفك كمان شايلني في دنياك منار
لكن غرورك وعزتي كانن بدايات الودار
لا انتا رضيان تعترف..لا قلبي راضي الانكسار
ومابين غرورك وعزتي جنتنا صبحت نار في نار
بالله ايه؟بالله كان ناقصنا ايه غير نحنا نحترم الجوار؟
ماريدنا تشهدلو الدروب والموية والضل والخدار
اوعك تقولي الزمن بي قسوة غير للمسار
واوعك تقولي الظروف بيناتنا ختت كم جدار
ما انت بي ضغطك علي خليتني اتخذ القرار
كل ما اجيك انا باليمين القاك في اقصى اليسار
تذكر ايامنا الزمااان..واحلامنا كان نبنيلنا دار
انشالله في طرف الفريق ياوينا من حر النهار
وياما كتبنا على الدروب اشواقنا بي خطا كبار
ياااربي وين راحو الحنين واللهفة ديك والانتظار؟
لا زال خطاباتك معاي اقراها..يملاني الحسار
وفي كل رسالاتك تقول قولا منمق باختصار
في بعدك الوقعت علي لومرة وقعت في الحجار
والله تبكي وتنتحب وتلبس من الاحزان سوار
ياااربي وين راحو الحنين واللهفة ديك والانتظار؟
ماكنتا دايما لي تقول لقيانا اكبر انتصار
وقبال يمر العام عليك ختيت علامة الشك شعار
مفروض تشاركني الحزن يوم شتت احلامنا العصار
مش تمشي تبكي وتنتحب وترحل تخليلي الديار
قصر الاماني الكان زمان للزيي والزيك مزار
بنى فوق بوابتو العنكبوت واتلما فوق عتبو الغبار
والارضة مسكت في الحجر والنيمة صابا الاصفرار..
************************

الحب والصداقة اتلاقو في حلتنا يوم

والجو كان جميل في الحتة كاسياه الغيوم
الناس في سعادة وبهجة اوعك من هموم
بلا فجاة الوضع يتغير وصاب الناس وجوم
الحب والصداقة اتشكلو وبالغو في الهجوم
وكل واحد يشكر نفسو وللتاني بيلوم
نحن مابين الضحك والدهشة قضينا احلي يوم
الحب قال:أنا المن قمت معروف في البلاد
عنواني الاماني العذبة والنوح والسهاد
والغيرة التعذب سيدا تحميه الرقاد
والشوق التلهلب نارو في ليل البعاد
خشتلو الصداقة وقالت :
الحب كان زماااان
يا مسكين انا المن قمت عنواني الأمان
الثقة والوداد حقاتي والناس الحنان
والضحكة التجلجل صافية في الزمن الهوان
الحب قام ضحك ياخلا بي صوتا عجيب
وقاليهم عليكم الله ياناس ماهو عيب
وروها الصداقة حدودا وكل القايلة غيب
انا الروح والزواج والاسرة انا لي مليون دريب
هناشوف عيني الصداقة اهتزت واعياها الجواب
وقالت ياكريم يا الله الهمني الصواب
قالت والزعل ماليها انت ضيعت الشباب
بي سببك ولاد الحلة من الجن قراب
الحب بي غرور ردالا قاليها : الشباب
شن جابهم قبيل لي بحري لا طوف لا شراع
اسمعي داير اقولك كلمة بي كل اقتناع
الزول البميل في الرقصة مايلبس قناع
قالتلو دة كان زمان وكت كنت وفي وعفيف
والعشاق زمانك كانو صح ريدهم شريف
لكن الزمان حلاك في الواقع مخيف
لابسلك قميصا تاني وبدلت النضيف
قاليها:
الصداقة اسكتي وخلي نهارنا يمشي
قبال ماامرق العارفو ومن بيتك تطشى
بي سبب المصالح انتي جوة النار تخشي
وبي اسم الاخوة الصادقة للحبان تغشي
قالتلو الاخوة الصادقة مكمنا في الضلوع
والقانون بحاسب ناسو بي نية الشروع
الزول القبيل بكيتو وماعرف الرجوع
ياني انا البطيب خاطرو وامسحلو الدموع
الحب هنا نكس راسو من كتر الكسوف
ومن كتر الزعل ياحليلو ماقادر يشوف
قالها والزعل في عينو تسلم لي الظروف
انا البقيت كل خلق الله بي اربعة حروف
قعدتلو الصداقة قصادو ونضمت بي رواقة
وقالتلو الكلام القلتو مليان بالشلاقة
أي اتنين معاك اختلفو جوني انا الصداقة
وضميتهم علي بي الفة ياشين ياخلاقة
قالها اوعك ماتسيئي ارجوك وانضمي بي ادب
قالتلو الادب مدرستي يا اب طبعا كعب
قاليها الكلام القلتي يهبش في العصب
قالتلو انت اناني وتهميشك وجب
وكتين الكلام احتد والناس دار تفوت
يبقالي القيامة ورانا قامت في البيوت
العاقلين هناك اتلمو وقالو باعلي صوت
الحب والصداقة ونيلنا من غيرن نمووووووت
والله من غيرن نمووووووووووت
**************************
عشان خاطر عيونك


عشان خاطر عيونك ديل افارق حلتي وطني
اسافر من بلاد لي بلاد كمل صبري وراح بدني
اضوق المرة واتغرب واكون مجبور اشد رحلي
وافوت ناسا حنان طيبين واقوت مرتع صباي واهلي
اشيل الزاد غنيواتن اردد فيها من جهلي
كلامه يقول انا الراحل وجاييك بكرة يا املي
جاييك يا غرام الروح لو حتى السنين دار تابة
وجاييك لو سنيني تدور وتدوس امالي انيابة
وجاييك لو يطول الليل ولو يبقى الوطن غابة
جاييك قولي لي كيف انساك وانا السافرته عشان عينيك
فت درب الوطن والعزة والحله المنورة بيك
فت امي وقليبه الحاني وحاجات تاني خافي عليك
وانت لا تشغل قليبك بيها ما دام الصحاب حوليك
قول لي يا حبيب برجاك لو حتى اغترابك طال
وقل لي ما بخونو هواك وما بسمع كلام عزال
وقول لي غير غرامك انت ريد يشغل قليبي محال
وطمن قلبي يا مريودي باقي الغربه زاته نضال
***************************
يانسمة مين غيرك ..؟؟



يانسمه مين غيرك يكسر حواجز البين
يتحفني بي اخبار مريودي نور العين
طولته مستني يكتبلي لو سطرين
يحكيلي كيف حالو وان شاء الله هو زين
مفروض يكاتبني مهما اكون انا وين
حسب اتفاقنا الكان يوم كنا متفارقين
رسلته مكتوبين ما جاتني أي ردود
ان شاء الله مانعو هو خير لا يبقى صد وجحود
يا حليلي انا الممكون وصابر على ناري
وكل ما ادس حزني تفضحني اشعاري
وكل العلي والبي اسبابو من جاري
ويومي الاقصر انا ما بيقبل اعزاري
يا نسمه قوليلو الحال وراك مايل
والليل بلاك ليلين وديمه الدمع سايل
قوليلو يومك داك يومي البقيت راحل
ماقلت لي الرد ما تشيلو هم واصل
يا نسمه عارفاني مكتول ضناني الشوق
للبلد من جم صلحاب كري والسوق
عمرابنا والقوزين ليهن سلام مطبوق
خاصه المحطه تحت وقز ام شديرة الفوق
شوق البلد جواي يا نسمه ازاني عديل
خلاني ابكي وانوح كل ما اشوف النيل
اطرى الجروف والناس تنزل دموعي تسيل
يمارى لي منظر منقه و قرين ونخيل
يا نسمه شفتي البي وتابعتي بالتفصيل
ارجوكي سافري خلاص واوعك من التاجيل
برجاكي فوق نارين حزني وظلام الليل
وبصبر لي يوم يومين فيها الله بيه كفيل
*********************
يوم الناس قالولك لا لا
واترجوك ماتفوت الدار
ضرب بي كلامن عرض الحائط
وشلت شنيطتك بي اصرار
قلت بسافر يعني بسافر
كل الناس بتقوم وتسافر
فعلا قمت ومشيت رايك
واتصرفت بدون ماتشاور
جيت البندر بي امالك
الا لقيت الوضع مغاير
خاب الامل الجيت عشانو
وقمت تلوم في الزمن الجاير

كنت هناك بالجد متريح
فوق واطتك طالع ونازل
تاكل وتشرب من نخلاتك
وتصرف وتنفق من غير طايل
آخر اليوم لي بيتك ترجع
لا في مدافره لافي مشاكل
لابتقيف في بص شماعه
دمك فاير وعرقك سايل
لانشال ينشل ماهيتك
لاكمساري معالك متثاقل
لابتأشر للملاكي
سوقني معاك ياعم ان واصل
تحرج نفسك انت بتعرف
انو الطيبه انصارا قلائل
انو تعوم عكس التيار
انت براك البدري اخترت
ليه ياقلبي تنوح تتبكى
وتندب حظك ليل ونهار

لمن قمت وجيت البندر
كنت بظن الحال اتصلح
كنت بتحلم بي مستقبل
فيهو ابواب الخير تتفتح
الا لقيت الواقع امرّ
وزينا ناس تعبانه وتكدح
ناسا عايشه معيشة راقيه
بي تلفونا بتخسر وتربح
وناسا عايشه علي الماهيه
من يوم خمسه الجيب اتقمح
وناسا عايشه على خلق الله
يوما شحده ويوما تلفح
غايتو الحاله معادله صعبه
كأنو الناس قاعدين في مسرح

عندي سؤال بالجد حيرني
ونشف ريقي وراهو نشاف
ليل ونهار شاغل تفكيري
لما بقيت انا منو اخاف
حال الزول القالو موظف
وراتبو الشهري شوية الاف
لو عديت مصروفو الشهري
اكيد تلقاهو اضعاف اضعاف

حلو معاي المسأله دي
وساعدوا معاي العم الزين
زول محمول وعندو اطفال
عشان ماياكلو يجيب من وين
يسرق ينهب يشحد
ولا كمان يغرق في الدين
عندو محمد واحمد وساره
وخمسه اطفال فوقم تومين
لازم يقرو وياكلو كويس
لازمن يلبسو لبسا زين
قولو معاي يسوي شنو
عشان مايعيشو يجيب من وين

عم الزين يعلمبو الباري
ديمه عليهو الجوف محروق
كان في الماضي ركازة الحله
وياهو البربط للمطلوق

هسه وين ياحليلو التايه
ودر واصبح جنو كلام
يصرف عربي مبالغ فيهو
وناس الحي سمو النضام
مرات يضحك لمن تشفق
ومرات يبكي بكا الايتام
عندو عباره تملي يقولا
اوعك تحسبا بالارقام
تتعب نفسك في تضريبا
وآخر حاجه تجيك اوهام

بعد الشفتو براك ياقلبي
اخير لك ترجع منك وليك
خلي وظيفة المكتب طايره
لا لا قسم مالايقه عليك
عود من تاني وازرع ارضك
دي مابتخدر الابايديك
عزة نفسك في واطتك
جنب نخلاتك وبين والديك
***********************
عفواً حبيب قلبي


انا قلبى شان ينساك دايرلو تانى زمن
عفوا حبيب قلبى ما انت لى وطن
***
انا قلبى ذنبه شنو عودته انت عليك
علمته يبكى ينوح يوم ما يشوف عينيك
وكتين ملكته خلاص فريتها لجنحيك
خاطبته باستبداد قلت ليه آه كان ليك
***
هو الصابر المسكين راجى اليالى تروق
لا كلّ لا ملّ لا عاتب المعشوق
كل القدر قالو ياناس كتلنى الشوق
والضقته فى دنياى ما ضاقو قط مخلوق
***
انا يا خلائق آه ضقت العذاب اصناف
شلت الليالى سقد تشهد تبارك وقاف
جربت صبر ايوب كانت نهايته كفاك
والصابنى يالمريود بالعين محال ينشاف
***
لو دار تعرف البى ارجوك مرة تعال
اقعد وعاين بس ما تسال اى سؤال
انا يا حليلى انا اصبح يمينى شمال
جوايا عشرة اشياء خلت حياتى محال
حظى التعيس الشوم الغيرة والعزال
ليل الضياع والخوف والحيرة والاهمال
انك تملى معاى و بيناتنا كم اميال
احساسى انى بسيط واحلامى واقفه جبال
صبر اً صبرتو عليك ذكرنى سيدنا بلال
حتى ان سكتّ انا تتكلم الاطلال
وآخر المطاف بالليل سافرت باستعجال
لا طلت بلح الشام لا ضقت راحة البال
***
برضك تقول لى اصبر اتحمل المكتوب
واتعوض الله خلاص انسانى يالمحبوب
خلتنى ذى عصفور هبت عليه هبوب
فنتلو عشو شمال شالت صغاره جنوب
**************************


قِبلة غناي


إحترتُّ كيفن أوصفك والله يا قِبلة غُناي
لو كان بحور الكون مداد بتجف قبل ما تنصفك
***
حاولت أكتب فيك وأقول وأوصف ملامحك بالشعر
لكن حروفي تذوب عديل قدام عيونك تنصهر
يا عايشة في دمي وغناي يا ديدن الروح والفكر
خلدت إسمك بي حروف قطرات دماي كانت حِبر
***
يا غُنوة في وتري الحزين يا ضحكة في الزمن الصعب
يا واحة في عِز الهجير يا راحة من بعد التعب
يا نسمة هبت في الدغيش عزفت علي وتر العصب
يا رحمة من رب العباد مكبوبة فوق خلق الله كب
***
سافرت في عينيك سنين زادي المعاي أبيات غُنا
مكتوبة بي دمي الصِبح شلال من الهم والعنا
صورت إحساسي الدفين بي قافية ليكِ معنونة
بتقول بلا كلفة ورتوش يا إنتِ يا الموت والفنى
***
إحترت في وصفك أنا وحارت معاي كل الحروف
مرات بشوفك ضي أمل درّج خطاي رغم الظروف
مرات بشوفكِ جارية نيل أمواجو عانقت الجروف
***
والله يا قبلة غُناي
**********************
الفرح الحزين



يا قلبي الحزين وين تمشي ليه كل الدروب مقفولة
كيفن زول يصل للجامعة يرجع تاني لي سنة أولى
ياما كتار حليلهم ضاعوا في زحمة دروب مجهولا
يزرعو في النوايا الطيبة كان ثمرة ضياع محصولا
الواحد يريد النجمة ما بيقبل يشوفو افولا
تلقى وسط ظروفو يشابي عشمان انو بكرة يطولا
مسكين كان يخادع نفسو بي سحب الخريف وهطولا
متعشم يقول المسرة يوم باكر يدقو طبولا
مسكين ياحليلو اتناسى نكبات الزمان وفصولا
واتناسى انو نحن غلابا احلامنا العراض مطبولا
من زمن القراية شراي ما بشوف غير سيوف مسلولا
كل ما اقول وصل لي مرسى القى احزاني شادى خيولا
قاسي الزي يقلى الداريو نقاي يعرف المصقولا
اول ما يقول ديك لي كل خلق الله بكرة يجولا
عايش فد سؤال جواي ليه لحظات فرحنا عجولا
وايام الحزن تندب زي السلحافية مهولا
اختلطت على ايامي قدامي الهموم مسدولا
ممشكلتي العلي ومالبي ما هو مرض دوا وكبسولا
اه اه اه
اه من دنيتي واقدارا اه من جحيما وهولا
شينا الزي بلقى الدايرو منو الدمعة ما مقبولا
لكن يا رفاق بالدغري كلمات بي صراحة بقولا
انا كان جنيت او ودرت تبقى ظروفي هي المسئولة
**************************
إفتقدتك


يا حبيبي أنا إفتقدتك لما فاض الشوق عليّا
وإنت عارف روحي غيرك لا بتموت لا بتبقى حيه
***
يا حليلي أنا كنت قايلك زي زمان مهتمي بيّا
في الحُزن تحزن معايا ويوم أغيب تسأل عليّا
بإختصار أنا كنت دايرك تبقى أقرب مني ليّا
وإنت تاريك بي مشاعرك مُستقر فوق الثريا
***
دا الصباح الفي عيونك باعني لي بحر الأسية
وسابني بين شطآنو هايم وجاري لا عند العشية
لاني قادر أقول كفاية ولاني راضي أكون ضحية
والمصيبة أنا كان بكيت ولا جنيت هيًّ هيَّ
***
كل مصيبتي هويت عيونك في زمن ظالم شوية
يكره الحب والتصافي ويعشق الجفا والرزية
الطيور وكتين تغني الزهور تصبح ندية
إلا عاد كيفن تغني وعينا في عين الحِّدية
***
إفتقدتك وإنت عارف زيي يعشق بالسجية
ومستعد ما عندو مانع يهدي ليك الروح هدية
لا بيهادن لا بيساوم لا بيبيع أبداً قضية
ولو تمور الدنيا فوقو يرتكب مليون جنية
***

إفتقدتك يا مُنايا ويا سعد روحي الشقية
لما فاضت بي هِمومي والأمور لاجت عليّا
إفتقدتك يا صباحي والضلام ضامِّي العشية
وإفتقدتك ألف مرة لما شمتو اصحابي فيّا
***
شُفت كيف أنا إفتقدتك لحظة الالم العتية
وإنت ماك جايب خِبيري وماك مفكر تبقى جية
حتى يوم لاقيت صِحابك منك إتوقع تحية
إلا وآخيبة رجايا ويا حلال الحسرة بيّا
***
ويا حبيبي أنا إفتقدتك
الرجوع الى أعلى الصفحة اذهب الى الأسفل
http://wadbashir.2morpg.com
 
الشاعرالفاتح ابراهيم بشير
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
ودبشير ارض الشمال :: القسم الخامس :: شعر وشعرا-
انتقل الى: